Yaponiyanın baş naziri Fumio Kisida bildirib ki, Rusiyanın nüvə silahından istifadə ehtimalı “getdikcə daha reallaşır”.

Xəbər verilir ki, bunu o, şənbə günü ABŞ səfiri Rama Emanuelin nüvə hücumuna məruz qalan ilk şəhər kimi Xirosimaya səfəri zamanı deyib.

Qeyd edildiyi kimi, Xirosimanı parlamentdə təmsil edən Kisida şənbə günü səfirlə birlikdə şəhər memorial və sülh muzeyini ziyarət edib.

Qeyd edək ki, atom silahı ilə hücuma məruz qalan yeganə ölkə Yaponiya nüvə silahına qarşı mütəmadi olaraq çıxış edirdi.

“Rusiyanın nüvə silahından mümkün istifadəsi getdikcə reallaşdıqca, inanıram ki, səfir Emanuelin Xirosimaya səfəri beynəlxalq ictimaiyyətə güclü mesaj verəcək”, – Kisida vurğulayıb.

Onun sözlərinə görə, Rusiyanın Ukraynaya qarşı müharibəsi bir sıra təhlükələrdən xəbər verir.

Bundan əvvəl Rusiya prezidenti Vladimir Putinin nümayəndəsi Dmitri Peskov bildirib ki, Rusiya nüvə silahından yalnız “ekzistensial təhlükə” ilə üzləşdiyi halda istifadə edə bilər.

Qeyd edək ki, G7 liderləri cümə axşamı Rusiyaya Ukrayna ilə müharibəsində bioloji, kimyəvi və ya nüvə silahlarından istifadə etməməsi barədə xəbərdarlıq ediblər.

Azadsoz.com

• Teqlər:
• Rusiya